ජීවිතයම හීනය කැයි කියා හිතෙනවා

මේ නගරය මා ඔබ මුණගැසුනු නගරයයි
මේ නගරය මා ඔබ වෙන් කෙරුනු නගරයයි..//

සරලත්වය තුලින් අති විශිෂ්ට ගී පද බිහි කල ප්‍රේමකීර්ති මහතාගේ ජනප්‍රිය ගීත ලයිස්තුවේ පෙරමුණේ තිබෙන ගීතයක් ලෙස “මේ නගරය” ගීතය පෙන්වා දිය හැකිය. ගීතය තුල යෙදී ඇත්තේ අතිශය සරල පද මාලාවකි. ගීතය තුලින් කියවෙන්නේ පේරාදෙණිය සරසවිය තුල දළුලා වැඩුණු ප්‍රේම වෘතාන්ත්‍රයක දුක්මුසු අවසානයක් පිළිබඳවයි. සැබවින්ම එකී ප්‍රේමයට මහනුවර නගරයේ සීමාවෙන් ඔබ්බට යන්නට මොනයම් හෝ හේතුවක් නිසා අවසර ලැබී නොමැත. ඔවුන් මුන ගැසුණු නගරයේම ඔවුන්ගේ වෙන් වීමත් සිදුව ඇත.

වැව් ඉවුරේ දිය රළ
පෙර සේම බිඳෙනවා
නුග ගස් පෙළ අප නැතිවත්
නව දලු ලනවා
සරසවි බිම කඳුරැල්ලෙන්
එතෙර පේනවා
ඔබත් එක්ක ආයෙත් එහි
යන්න හිතෙනවා

ඔවුන්ගේ ප්‍රේමය අවසන් වූ නමුත් නගරය තුල ඔවුන්ගේ මතක අතර ඇති කිසිවක් නොවෙනස්ව පවතියි. පෙම්වතා සිය අතීත ප්‍රේමය තුල තනි වී මතක අතර සැරිසරයි. පෙර පෙම්වතිය හා යලිත් සරසවි බිම තුල පියමන් කිරීමට, දොඩමලු වීමට ඔහු තුල අහිංසක ආශාවක් මැවෙයි.

ඔබ අතගෙන ගිය වීදියෙ
ඈ හා යනවා
පුංචි පුතා අතැඟිල්ලේ
එල්ලී යනවා
ඒ කාලේ පැතූ පැතුම්
යළි සිහි වෙනවා
ජීවිතයම හීනය කැයි
කියා හිතෙනවා

මේ පෙම්වතා දැන් විවාහකයි. ඔහු පියෙක්. අතීත පෙම්වතිය හා ගිය වීදියේ ඔහු දැන් සක්මන් කරන්නේ සිය බිරිඳ හා කුඩා පුතු සමගින්. එකල ඇය සමග පැතූ පැතුම් ඔහුට සිහි ගැන්වෙනවා. ඒ පැතුම් ඉටු නොවීම තුල ඔහුගේ සිතේ ඇති වෙන්නේ අපරිමිත දුකක්. ජීවිතයම හැබෑවක් නොවෙයි සිහිනයක් යැයි සිතමින් ඔහු සිය දුක තුනී කර ගන්නට උත්සහ කරනවා.
ගීතය අසන්නෙකු සැබවින්ම මේ ගීතය තුල මොහොතකට හෝ අනිවාර්යයෙන්ම ජීවත් වනවා. ගීතය තුල පෙම්වතාගේ අත්දකීම් රසික අත්දැකීම් හා මුසු වන්නට ප්‍රේමකීර්ති මහතාගේ සරල පදවැල් ප්‍රධානතම හේතුවක් වනවා.

ගායනය හා සංගීතය : මර්වින් පෙරේරා
පද : ප්‍රේමකීර්ති ද අල්විස්